بالعربي الكسيح
محمد الطيب الأمين
هلال ما بشبه ظروف البلد والكاردينال يغازل السر قدور !!
* من الأشياء التي كانت تعجبنا ولم تزل: (الباب البيفتح بالإحساس).
* قبل سنوات قليلة ظهرت أبواب في البنوك والشركات والمؤسسات، أبواب عندما تقترب منها بتفتح براها .
* لما تكون بينك وبين الباب (متر) أو (خطوة) بيقوم الباب يفتح اتوماتيك.
* براهو بفتح .
* بالإحساس بس .
* يا كافي البلا الإحساس العند الباب لا يوجد حتى عند الكيزان.
* أولاد حلتنا كانوا بيغشوا هذه النوعية من الأبواب.
* تقرب للباب لما يفتح ترجع تخليهو .
* وتاني تجيهو لما يفتح ترجع تخليهو .
* ثقالة بس ما أكتر.
* نحن كده ، الله خلقنا كده ، بنحب نلعب مع الأبواب.
* وأي زول طبعا حر في (حبو) .
* المهم .
* هذا الجهاز الذي الذي يجبر الباب على الانفتاح يجب أن نستعين بجهاز مثله في نادي الهلال.
* العلم تتطور جدا ولابد أن نستعين بجهاز بمواصفات خاصة.
* جهاز نربطو للنجم عبد الرؤوف .
* كل لاعب من الخصم يقرب على عبد الرؤوف يقوم الجهاز يشتغل ولاعب الخصم يقيف في محلو .
* هنالك لما تقرب من الباب الباب بيفتح وهنا لما تقرب لعبد الرءوف تقوم تقيف أتوماتيك.
* يتعرض عبد الرءوف لعنف غير قانوني لا لشيء عدا أنه (موهبة وفلتة) .
* تصفية المواهب هي أمور عانى منها الهلال كثيرا وعلى مدار السنوات .
* في الهلال فقدنا مواهب عظيمة بسبب العنف والتصفية.
* أشهر مواهب الهلال التي راحت ضحية للعنف النجم الكبير والأمير والي الدين محمد عبد الله .
* وكذلك محمد عبد الرحمن وأخيرا نزار حامد .
* الإصابات أقدار ولكن سوء القصد وارد في كرة القدم .
* ونحن صراحة نخاف على عبد الرءوف من التصفية والعين .
* طبعا العين لا نملك وسيلة لمنعها فقط نطلب منه أن يتحصن بالقرآن الكريم ويتوكل على الخالق العزيز .
* عيون الهلالاب باااااااردة وبتقول (ماشاء الله) .
* كعبة عين الحسود.
* قانون التحكيم الجديد أبرز اهتماما كبيرا بالمواهب وطريقة حمايتها .
* وهذا أمر إيجابي جدا .
* (ماشاء الله تبارك الله) عبد الرؤوف يقدم نفسه بصورة ساحرة .
* إمكانيات كبيرة وفنيات عالية وحضور وخيال وبرود.
* ماشاء الله تبارك الله .
* شكل الهلال ذاتو أتغير.
* الهلال بقى سمح .
* سمح من حيث الشكل والمضمون.
* لا أريد أن اهضم حقوق الباقين ولكن لمسة عبد الرؤوف منحت الهلال (طعم ولون ورائحة) .
* نستمتع هذه الأيام بمياريات الهلال وهذا الأداء الأنيق والروح العالية للنجوم .
* نستمتع بلمسات عبد الرؤوف وتطور محمد موسى وصحوة الشعلة .
* وحتى المدافع الجديد ديديه ماشاء الله عليه .
* ما في كلام .
* تمنيت والله أن يكون نزار حامد حاضرا .
* نحن في الهلال بنفقد المواهب حتى عندما نكون في أفضل حال .
* ونزار حامد نجم ما ساهل نتمنى والله عودته .
* نزار مع عبد الرؤوف طوالي بنجيب عبد الوهاب وردي مساعد مدرب وعوض احمودي مدرب لياقة ومحمود تاور مدير كرة .
* الهلال بقى فن .
* شيل خالد النقر يا كاردينال وجيب لينا السر قدور مدير كرة .
* الحمدلله .
* الهلال يتعافى ويعود .
* نعذر الجمهور الذي أبتعد عن المباريات ولكن حتما سيعود .
* وما الحب إلا للحبيب الأول.
* الغريب في الأمر الهلال الأيام دي ما بشبه ظروف البلد .
* كل حاجة في البلد وقعت ما عدا الهلال .
* الجنيه وقع .
* والمرتب وقع .
* المواصلات وقعت .
* الدقيق وقع .
* الوقود .
* الغاز .
* والناس الواقفة في الصفوف وقعت .
* والتش وقع .
* والهلال واقف وسط كل هذه الأزمات.
* عشان كده ده حبنا .
* وملاذنا.
* نتمنى السلامة لعبد الرؤوف وكل نجوم الهلال .
* وما تنسى السر قدور بدل النقر يا كاردينال.
* ونركب صافنات ونجيبة (بورتسودانية) واصلو الزول بيموت والذكرى تفضل حية .
* و..و..
* ومن المسلط ومن العين الشافتو وما صلت يغطي الله
المصدر: هلال ما بشبه ظروف البلد والكاردينال يغازل السر قدور !! بموقع صحيفة كورة سودانية الإلكترونية.
Source: New feed
About Post Author
