* يقيني إن أخطر سؤال ورد في الأغنية السودانية كان من نصيب  العندليب الراحل زيدان إبراهيم وهو : (كنت بتقول لي بحبك والليلة مالك ما بتقولا)؟
* سؤال فيه (إجابة).
* السؤال ده بالذات يحمل إجابته.
* بعض الأسئلة فيها كثير من (الطيبة).
* طيبة شديدة.
* سؤال لا يحتاج لإجابة ولكن في (دنيا الريد) لا يطيب قلب المحب إلا بعد أن يسمع من المحبوب مباشرة .
* (كنت بتقول لي بحبك والليلة مالك ما بتقولا)؟
* الإجابة باختصار هي (بقى ما بقول ليك بحبك لأنو بقى ما بحبك).
* واااضحة .
* وكثير من الأسئلة التي هي على شاكلة : (هانت الأيام عليك ولا هنت عليك أنا)؟ ، و(كنت بتقول لي بريدك والليلة مالك ما بتقولا)؟ كثير من هذه الأسئلة لا نجد لها إجابات مع إنها تحمل كل الإجابات .
* وأخطر سؤال يطرحه الشارع الرياضي هو : المريخ بيطير من التمهيدي مالو؟
* سؤال يحمل إجابته.
* المريخ بيطير من التمهيدي لأنو هو فريق طموحه وإمكانياته (تمهيدي) .
* واااااضحة.
* وما دايرة ليها درس عصر .
* ثم أن المريخ (بقت ما فارقة معاهو)، يطير من التمهيدي ولا ما يطير المهم بتلقاهو مشارك في الأبطال النسخة القادمة بفضل الهلال.
* وفي ذلك هو يجسد قصة (ولد المديرة) الذي لا يقرأ ويجد نفسه في العشرة الأوائل بفضل (المديرة).
* وغايتو جنس غايتو.
* في  مدينة الأبيض (الرغيفة) بتلاتة جنيهات.
* وفي الخرطوم اتجاه لتصبح الرغيفة بجنيه ونصف.
* الذي يجب أن يدركه حمدوك أن هذا الشعب لا يستحمل زيادات جديدة في أي شيء .
* أي زيادة في أي حاجة ستكسر ضهر المواطن.
* الزيادة الوحيدة المرحب بها هي (زيادة المرتبات) و(زيادة السجن ترباس) حتى نتقن (حبس الذين أكلوا لحمنا طوال 30 سنة ودخلوا في العضم).
* نعم، التحديات أمام الحكومة الجديدة كبيرة ولكن (جيوب المواطنين) لا تستحمل عبئاً جديداً.
* والله في..
* صحوة منتخبنا الوطني خلال الفترة الأخيرة يجب أن تتواصل حتى تحقق غاياتها.
* يجد المنتخب اهتماماً طيباً من قبل لجنة المنتخبات الوطنية التابعة للاتحاد العام.
* اهتمام جعل اللجنة تستدعي نخبة من اللاعبين السودانيين بالخارج وذلك لأول مرة.
* وهذا فهم جيد سيشكل إضافة حقيقة للمنتخب على المدى القريب والبعيد.
* نرجو أن يحظى منتخبنا بالدعم الجماهيري المطلوب بعد غدٍ حتى نعبر تنزانيا ونفتح شهية أولادنا الجايين من أوروبا .
* كما نرجو من الأخت ولاء البوشي وزير الشباب أن لا تشغل نفسها ببلاغات عبد الحي يوسف وتهمل القضايا الرياضية الشائكة.
* الشيخ عبد الحي (عمل موضوع من مافي) وذلك لأن الدين لم يستهدفه أحد حتى الآن.
* ما في زول قال ما داير دين لكن شيخ عبد الحي (متحسس شوية).
* عموماً كل التوفيق لصقور الجديان بعد غداً.
* المهم.
* ورد في الأخبار أن أي لاعب ينتهي عقده في الشهر الجاري، يحق له التسجيل في أي نادٍ يرغب في خدماته.
* طيب لو في نادٍ يرغب في خدمات لاعب انتهى عقده مع ناديه، بينما النادي الذي يرغب لا يملك خانة شاغرة لإضافة اللاعب الذي يرغب فيه.
* هل يمكن للنادي في هذه الحالة أن يشطب في هذه الفترة حتى يضيف اللاعب الذي يرغب فيه؟ علماً بأن الشطب والتسجيل شهر يناير القادم؟
* في ربكة شديدة فيما يتعلق بموضوع التسجيلات.
* ربكة تصل مرحلة التخبط.
* ولكن على الهلال أن يكون جاهزاً في كل الأحوال.
* ولا نمل القول إن هنالك أكثر من لاعب مريخي سينتهي عقده هذا الشهر.
* ثلاثة لاعبين في كشف المريخ يستحقون ارتداء شعار الهلال فيجب أن نفاوضهم اليوم قبل الغد.
* كما نتوقع أن يدخل حي الوادي نيالا في مفاوضات مباشرة مع عدد من لاعبي المريخ.
* حي الوادي تحت رعاية الدعم السريع.
* يعني حميدتي لو عايز يشيل الرد كاسل يوديهو نيالا لما غلبه ذلك.
* المال يتكلم.
* ولما نجيب سيرة المال ناس المريخ بيضايقوا.
* المال الذي كان يجري في أيادي أهل المريخ بفضل (الكوز) جمال الوالي، أصبح الآن المال ولبن الطير حاجة واحدة في المريخ.
* فلس شديد.
* بمناسبة الفلس.
* قالوا مدرب المريخ الجزائري (اب شنب) شغال مجاناً لمدة ثلاثة أشهر .
* بعد تلاتة أشهر لو نجح بيعملوا ليهو مرتب ولو ما نجح يبقي الله معاهو شديد.
* يعني مدرب تحت الاختبار .
* صلاح نمر لو مشارك أساسي ممكن يكون سبب في الإطاحة بهذا المدرب.
* والله صحي.
* صلاح نمر بيرفع ضغط الجمهور وبيشيل الأجهزة الفنية.
* لاعب صلاحياتو واسعة جداً.
* جلطة واحدة من نمر ممكن تجيب أجل المدرب.
* لاعب مبدع في الفشل.
* وغايتو الله يكفينا شر (المصدي) اللمعتو الأيام.
* و..و..
* وهانت الأيام عليك ولا …..(عشان عملت ليك عربية)؟

Source: باج نيوز