في السلك

بابكر سلك
*الجميلة و مستحيلة
*من اعرق جامعات العالم
*كانت كلية غردون
*ثم اشرقت جامعة الخرطوم
*اسهمت في تأهيل الرعيل الاول للخدمة المدنية
*تخرج فيها علماء وضعوا بصماتهم العلمية علي دفتر الحضور العالمي
*وتوسعت وكبرت وزادت احتراما
*سمعنا عن الهجمة التخريبية التي اصابتها
*والكل يدفع عن نفسه مسؤولية الخراب
*شأنه شأن فض الاعتصام
*الجميع ينكره حطب للممارسات المنكرة التي تم اتباعها في مجزرة فض الاعتصام
*والتي يبرر البعض العمله السودة بان عدد القتلي ليس كما تداوله الناس
*وكأن قتل الناس له نصاب وعدد دونه لايعتبر قتل الناس جريمة
*وفينا من يبرر بقوله ان القاء الجثامين في النيل ضرب من الخيال
*وكأن القتل مباح اذا لم يتم القاء المقتول في النيل
*ولاتزال بطن النيل حبلي بفوارس الثوار
*وقعوا براهم
*انتحروا
*وفينا من ينتقد ضرب مطار ابها ويشتغل صامت حيال مجزرة الثالث من يونيو
*يونيو الذي ارتبط(بالفقر) عندنا
*شهر فقر خلاس
*غير الخبوب مابجيب لينا شئ
*واخيرا تناول الناس التخريب الذي اصاب الجميلة ومستحيلة جامعة الخرطوم
*وكالعادة الجميع ينفي التهمه عن نفسه ويرميها علي غيره
*لكن انا عارف الخرب جامعة الخرطوم منو
*خربها العربها
*خربها الملاها مكاتب امن وكتائب
*خربها الفتح بواباتها للعسكر
*خربها الداير يصنع منها معسكر لتجنيد التبع
*عرفتوا منو؟
*اوضح ليكم اكتر
*اقروا الكلام المكتوب علي الحوائط
*وشوفوا الرسومات
*بتعرفوا الخربها منو
*لسه ماعرفتوا؟؟؟
*عارفكم عارفين لكن عاملين رايحين
*زمن الغتغيت انتهي
*خربها الفتح موضوع خرابها وسكت علي ارواح شباب سلبت ودماء شرفاء سالت
*وقع ليكم ولا اوقعو ليكم !!!!
*ايها الناس
*اتفق مع الفريق شمس الدين في ان اعادت النت تشكل مهددا للامن
*لانو الفيديوهات الشفناها دي
*لو شافها الشعب الامن الا يطير
*بشاعة لم نشاهدها في فيلم جاسوس
*ولا في افلام عصابات المخدرات والمافيا
*عشان كده النت ده حقو مايرجع نهائي
*لانو لو رجع حتي ولو بعد مية سنة
*حانلقي ناس القبور واقفين طابور للقصاص
*بيعو النت لحقوهوا خط هيثرو
*كي لايكون مهددا للامن
*هو الاتباع في البلد دي شوية؟؟؟
*ايها الناس
*نترحم علي الشهداء مع كل طرفة عين
*ولن ننسي
*المهم
*الزولفاني قالوا مشي عمان
*عملتها ظاهره يامعاوية الجاك
*اقصد يا الزولفاني
*خليت الجنيه الفاني ومشيت للريال العماني
*اخير ليك يا اخوي
*بلد صرافها الآلي لابيدفع لابخجل لا ببالي
*البقعدك فيها شنو؟
*وشايف زولفا ساق الجهاز الفني كلو
*حتي السوداني
*ناس عمان ديل مادايرين مجلس ادارة عشان نشهل ليهم ناس اسد وشمس ديل؟؟
*المهم
*مباراة الحرية والمجلس مستمرة
*ومتوترة برغم التحكيم الاجنبي
*حكم الوسط اثيوبي
*رجال الخطوط افارقة من افريقيا السمراء
*المراقب امريكي
*والحكم الرابع عربي رغم حضوره المتأخر
*ولكن الجماهير تسأل عن اسم مدرب المجلس
*تشكيلة غريبة يلعب بها
*تغييرات مستعجلة وغير مجدية ولم تغير في شكل اداء الفريق
*حتي الخانات جوه الملعب ملعب فيها لاعبين مقلوبين
*ادي ذلك لحدوث ربكة في اداء فريق المجلس
*شمس الدين صرج واحدة قربت تخش فيهم قون
*ود العطا الجماهير استبشرت به خيرا
*لكن كورتو كلها عملها لي ورا
*بعض لاعبي المجلس في العشرة دقائق الاخيرة بقوا يتدسوا
*لا بظهر عشان يستلم كورة
*ولا بمرر لي زميل
*الامر الذي افقد منتخب المجلس الاستحواذ علي الكرة
*وبقي لاعب مضغوط
*يظهر مدربهم ده مغمور
*بالذات ابقاؤه علي الطرف اليمين القاعد ساي ده
*لابقطع لابغطي ولابفتح خانة
*ولما سألوهوا قال دي كورة دي
*مقومات كورة مافيها
*لاملعب ولا جمهور ولا حوافز تخلي الزول يلعب
*واول كورة جاتو بيضها
*مدرب غريب انا ماعارفو داير يصل لشنو
*فريق الحرية مازالت تعيبه ختام الهجمة
*ضيع اهداف بالجملة
*والزمن ماشي ومحسوب عليهو
*بالذات والمباراة في ارضو ووسط جمهوروا
*وحقو فريق الحرية يعرف
*انو لو اضاع نقاط هذه المباراة
*تاني ستين سنة ماحايلعب سنترليق صعود
*من بدري الحكام بطيروهوا
*وخسارة فريق الحرية لهذه المباراة
*حايهبط معاهو فريق الشعب
*لانو لو فريق المجلس انتصر
*حايصعد هو
*وحايهبط الحرية والشعب
*ولو فاز الحرية
*الشعب بكون فايت المجلس بنقطة
*وبالتالي يصعد مع الحرية
*لعب المجلس خشن نعم
*ولكن قوة التحمل مطلوبة من الحرية لاجل تأهل انتظرناهوا تلتين سنة
*ايها الناس
*ان تنصروا الله ينصركم
*اها
*نجي لي شمارات والي الخرتوم
*باستقالتك شرفتنا ياوالينا
*لسه البلد خيرها فينا
سلك كهربا
ننساك كيف والكلب قال عرفتوا الخرب جامعة الخرطوم منوووو ولي شنووووو؟؟؟
والي لقاء
سلك

المصدر: مين الخرب جامعة الخرطوم؟؟؟؟؟ بموقع صحيفة كورة سودانية الإلكترونية.

Source: New feed

About Post Author